Ob Sepp Blatter, der Drohnen-Angriff auf Marcel Hirscher oder die Glückshose von Stan Wawrinka vom vergangenen French-Open, die Gruppen der Schnitzelbänke an der Basler Fasnacht haben auch dieses Jahr kein Thema ausgelassen.
Doch lesen sie selbst:
Dr Donald Trömp duet jokere,
dr Putin duet gäärn pookere,
dr Johnny spiilt dr Depp
und d FIFA spiilt „Tschau Sepp“!
(Bangg Rott)
Si schutte wie die Grosse, numme s Spiilfäld isch lyycht z glai,
Und wääge-n-iire Ränze sinn si langsam uff de Bai,
Si flueche vor sich aane und dä Diggsagg deert schnuuft schwäär,
Im Gfängnishof lauft s Grimpeli vo de FIFA-Funktionäär!
(PereFyss)
Seppli Blatter blaa blaa blaa
so food das FIFA Märli aa.
Fir d Nochfolg mecht äär sälber luege,
s brucht jetz e Maa kai bsunders guete.
Ilusteri Gselle steen zer Waal,
mit syyne Maidligschichte dr Karl Daal.
Dr Putin miesst unbedingt mit ins Boot,
suscht sinn bald alli Regime-Kritiger» doot!
Dr Somm dä vo däm Baasler Blatt,
hänn bald scho alli Baasler satt.
Ych wünschti mir är miech do s Renne,
sunscht wurd me ihn als «Böög» verbrenne.
Dr Höness kennt sich scho uss im Gnascht,
S hoggt dr Kaiser Franz uff em aagsäägte Ascht. Dr Zinédine Zidane waiss sich z weere,
s wird s dr Ronaldo vo ihm au no leere.
S griegt dr Blatter vom vyyle dugge,
langsam e richtig grumme Rugge.
Mir Kinschtler saage s gheert mit an Disch,
dr Möörgeli,wo waiss was aagschmiert isch!
(Kinschtler)
Stell dir vor, dr Stephan Lichtsteiener und dr Xherdan Shakiri stöön nääbe enender bi dr Landeshymne.
Daas ka ych mir vorstelle!
Also ych wäär dr Shakiri, du dr Lichtsteiner:
Shakiri: Triffsch nit mehr im Morgeroot
Lichtsteiner: Waisch du nit, wie d Hymme goot
Shakiri: Ey, nur Schwizer singe, du bisch keiner
du bisch numme Licht(e)steiner
(Bangg Rott)
Uff em Fuessballfäld dien sich bewege,
zwai Teams wo mitenand Mundart rede.
Das bassiert, und isch kai Witz,
spielt an dr Euro Albanie gege d Schwyz.
(Käller-Assle)
Ganz eerlig dää Urs Fischer macht si Sach doch gar nit schlächt,
Und ass e Ziircher z Basel schafft, isch au e Menscherächt.
Mir Basler sinn soo tolerant, do gitts nie kai Beschwäärde,
Esoo ka wenigschtens ai Ziircher Schwyzermaischter wäärde!
(PereFyss)
Bisch mol uf em Mischtstogg glande
und bis zum Hals im Mischt getannte
waar so dief im Schissdrägg stoot
weis wie's em FC Züüri goot
(Alperöösli)
Ych haa jetzt au so Hoose aa, wie z Frankrych dr Stan Wrawinka.
Die hälfe bim Suffe, denn hesch ain im Gool
luegsch druff und s isch dr vor Schregg wiider wool.
(Käller-Assle)
S‘Skikader vo de Männer isch – e ganz e druurig Huffe
Die müen also jede Daag – literwiis Ovi suffe
Mir hän versuecht – däne z‘hälfe – und k‘hofft s‘wär besser gloffe
Doch leider hän mir dr Marcel Hirscher – mit dr Drohne nid richtig troffe
(Bajass&Omega)