Stufe 4: Definitiv verbii - Bitte nüme säge.
Die Wörter sind scho längschtens nüme modern. Wahrschinlich sinds sogar scho mal vomä Bundesrat brucht worde.
Verhängt
Vergässe, mängisch wirds aber au als beschribig für e tollpatschigi Person bruucht «En verhängte Mensch»
Relaxe (Sprich «riläxe»)
Chille, s Läbe gnüsse - Sälte ghört mer das no, aber es isch langsam chli usglutscht
Shads - und ali andere Wörter wo anstatt mit «sch» mit «sh» gschribe worde sind
Dass mer bi Wörter s «c» usem «sch» wegglah het, isch damals nötig gsi, will mer bi SMS nur e begrenzti Azahl Zeiche het chönne verwende (susch wäreds zwei SMS worde und das wer z'tüür gsi). Hüt isch das dank Whatsapp nüme nötig.
Chat-Abchürzige wie ly, bb oder hdgdl
«Love you», «bis bald» und «hab dich ganz doll lieb» hät mer früener au nöd chöne usschribe. Hütt chamer das zum Glück
Yolo
Du läbsch nur eimal - Es sött eigentlich usser Frag stah, dass niemert me Yolo seit. Zur Sicherheit aber nomal schriftlich: Säg nöd Yolo!
Andersch
Extrem, unglaublich - Es git tatsächlich no lüt wo das hütt säged, generell ischs aber nüme cool und mer sötts bliibe lah.
Hey Mann!
Hallo, du! (Usruef) - Villne Ü30-Lüüt isch das bis hütt nöd bewusst, aber de Usdruck isch s'letschte mal im öppe Jahr 2000 cool gsii. Also vor sehr langer Ziit.
Stufe 3: Es wird no gseit, aber langsam sägeds au d'Lehrer...
.... und das bedütet nüt guets: Die Wörter und Usdrück sind am Untergang gweiht. Mer chan sie zwar no säge, aber es lohnt sich nöd, sie no neu z'lerne.
Alte, Alti, Alda, Alter
Bedütig A: Du, wird zum e Person aspreche vor de Satz gstellt. Bedütig B: Gopfriedstutz! Chan als einzelne Usruef oder im Zämehang mitere Ussag bruucht werde.
Läuft bei dir
Krass, mängisch mit ironischem Unterton - De Usdruck gits jetz scho so lang, dass es Ziit wird, dass er verschwindet.
Bruder, Brudi, Bro und Brate
Fürd Bedütig wird uf Alte, Alti, Alda, Alter verwise. - Die Wörer hend mittlerwile de Primarschulepauseplatz erreicht. Zu de Wiiterentwicklig «Brä» bi de negschte Stufe meh.
Fame
Ruhm, berüehmt (Als Adjektiv) - Sälte ghört mer no de Usdruck «Meinsch bisch jetz Fame oder so?» aber eigentlich isch de Fame am ussterbe im schwizer Jugendvokabular.
Chill mal!
Mach keis Büro uf! (Usruef) - De Usdruck hets nie uf die erste Plätz i de Jugendsprach-Charts gschafft und isch sich au schowieder am verzieh.
Das fühli
Das findi super - Bi dem Usdruck gahts aber nöd öppe um tolli Erfahrige für de Taschtsinn, sondern um grundsätzlich ales. Mer chan Cheeseburger fühle, es neus Lied vo de Beyoncé oder au s Wätter.
Creepy
Beängschtigend - Wills halt eifacher isch, zwei anstatt vier silbe zsäge, wiched mir bi dem Wort gern uf die englisch Variante us.
Stufe 2: Die Wörter ghörsch grad überall
Ob du wottsch oder nöd, die Wörter häsch sicher schomal ghört.
Fix, Safe
Klar, sicher, da chasch Gift druf neh - Wird zum Bispil so verwendet: A: Gsemmer eus morn? B: Wenni denn nöd schaffe, fix..
Savage (Sprich «säwitsch»)
Krass, rücksichtslos (meischtens mit respektvollem Unterton) - Das Wort chan sich uf e Person oder e Aktion bezieh und bringt zum Usdruck, dass Öpper de Ander fertiggmacht het.
Sick
Krass - Wird meischtens im Zämehang mit Musig verwändet. (Gwüssi Lüt behaupted sogar, dass es de Usdruck «Sicki Beats» git)
Fresh
Lässig - Fresh bedütet s gliiche wie cool. Chelti finded Jugendlichi igendwie immer lässig.
2k17 anstatt 2017
S «k» staht für «Tuusig» - Warum mer da nöd eifach gschnäll es Null aneschribt, het no niemert usegfunde.
Bra
Fürd Bedütig wird au da wieder uf Alte, Alti, Alda und Alter verwiese. - S Wort isch am englische «Brother» entsprunge. Im amerikanische Släng ischs denn nadisna vo Bro zu Bra worde. Hütt sägeds sogar 10-Jährigi Primarschüeler ufem Pauseplatz.
parat
Bedütig A: Bsoffe
Bedütig B: en parate Maa isch en sympathische Maa oder en uhuere Chaschte
Bedütig C: E parati Frau isch e heissi Frau (Mär munklät, dass für die Bedüütig neu s Wort «stabiil» bruucht wird)
k.
Isch e Abchürzig für okay. - Bsunders gern wird die Abchürzig vo hässige Fründinne gnutzt, wenn si ihrem Fründ uf Whatsapp schüüch (siehe unten) wend adüte, dass si WÜKLI hässig sind.
schüüch
näbedbii, am Rande, es bitzli (meischtens ironisch) - Zum Bischpil: «Am Wuchenänd bini schüch betrunke gsii» heisst «Am Wuchenänd bini völlig bsoffe gsii». Wenn öpper völlig offesichtlich zeige will, dass er isch go Sport mache, denn het ers wahrschinli «schüüch is Gspräch iflüsse lah».
Stufe 1: Nonig ganz i de Schwiiz aacho
Die Wörter werded i gwüsse Chreise scho regelmässig brucht, bi de breite Masse sinds aber nonig acho. Sie hend aber s Potential, zum negschte Worthype i de Schwiiz zwerde.
Lit
Läss - Es Wort wos im englische Sprachruum scho lang ganz ad Spitze vo de Trends gschafft het. Bi eus ghört mers au immer öfter, aber ali sägeds no lang nöd.
On Fleek
Perfekt, auf den Punkt gebracht - Wänn öppis on fleek isch, denn stimmt eifach alles. Mer munklet übrigens, dass de Begriff sin Ursprung i dem Video da het, wo es Meitli ihri Augebraue als «on fleek» bezeichnet.
Fresco
Fürd Bedütig wird ufs Wort Fresh verwiese. - Fresco bedütet nämmli, wörtlich übersetzt, nume chüel. Aber will «fresh» zu mainstream isch, wechslemer jetz uf Spanisch.
Slay
Sehr lässig - Als slay werded oft heissi Fraue bezeichnet. Im Gegesatz zu de wörtliche Bedütig (abschlachte) isch das aber positiv gmeint.
Dude
(Männliche) Kolleg - Dude chunt ebefalls us em Englische Sprachruum und wird öppe glich verwendet wie Bro. Au wenns das Wort scho lang git, hets sich i de Schwiiz noni so chöne etabliere.
Weird (Sprich «wiird»)
Komisch - Öppe so wie creepy wird s Wort weird verwendet. Obwohls eifach zum usspreche isch, säged mir i de Schwiiz das Wort immer noni so oft.
«Chill dini Basis»
Bi eus kennt das niemert, aber mir sind ja au nüme 13i. Chan eus öpper erchläre was das genau heisst?